भावुक बनिन् सांसद रचना खतिवडा-जिउँदो छोरो ल्याइदेऊ, अहिल्यै सांसद छाडिदिन्छु

काठमाडौँ । राष्ट्रिय स्वतन्त्र पार्टी रास्वपाकी सांसद रचना खतिवडा खत्रीले आफू कुनै राजनीतिक रहर वा पदको लोभमा संसद् नआएको स्पष्ट पार्दै जेनजी आन्दोलनमा बलिदान दिएका छोरासहित सम्पूर्ण सहिदको न्यायका लागि संसद्मा खबरदारी गरिरहेको बताएकी छन् ।

मंगलबार बसेको प्रतिनिधिसभा बैठकको शून्य समयमा बोल्दै सांसद खत्रीले आफ्नो व्यक्तिगत पीडा र न्यायको यात्राबारे बोल्दा संसद्को माहोल भावुक बनेको थियो। उनले आफ्ना छोराको बलिदान खेर जान नदिन र वर्तमान सरकारलाई उत्तरदायी बनाउन आफू संसद्मा पुगेको बताइन् ।

आफ्नो मर्मस्पर्शी वक्तव्य राख्दै उनले भनिन्, “आज यो गरिमामय सदनमा उभिनु मेरो लागि कुनै राजनीतिक रहर वा पदको लालच थिएन । यो मेरो न्याय खोज्ने यात्रा हो। मेरो कोखमा नौ महिना हुर्किएर, ताते(ताते गर्दै मेरा आँखासामुन्ने बढेको मेरो मुटुको टुक्रा यतिबेलाको शासकले चलाएको तातो गोली र उसको बगेको रातो रगतले न्याय खोज्दै थियो। यो एउटा पवित्र यात्रा हो ।”