काठमाण्डौँ । देशका अधिकांश भूभागमा अहिले वर्षा भइरहेको छ । अहिले कोशी, बागमती, गण्डकी, लुम्बिनी, कर्णाली र सुदूरपश्चिमका धेरै ठाउँमा हल्कादेखि मध्यम वर्षा भइरहेको जल तथा मौसम पूर्वानुमान महाशाखाले जनाएको छ । गण्डकी र लुम्बिनी आसपासका क्षेत्रमा भने तुलनात्मक रूपमा बढी वर्षा भइरहेको छ।

पछिल्लो २४ घण्टामा कोशी, बागमती, गण्डकी र लुम्बिनीका केही ठाउँमा भारीदेखि धेरै भारी वर्षासमेत मापन भएको मौसमविद् रोजन लामिछानेले बताए।

काठमाडौं लगायतका अधिकांश ठाउँमा दुई दिनदेखि लगातार पानी परिरहेको छ । बंगालको खाडीमा विकसित न्यूनचापीय प्रणाली भारत प्रवेश गरेपछि यसको प्रभावले नेपालसम्म पानी पारेको हो ।