काठमाण्डाैँ । ११ वर्षको उमेरमै नेपाली सांगीतिक क्षेत्रमा आफ्नो छुट्टै पहिचान बनाउन सफल हुँदै गरेकी बालप्रतिभा सुवाशना खड्का केसी अहिले हिमालय टेलिभिजनबाट प्रसारण भइरहेको नेपालको सर्वाधिक लोकप्रिय गायन रियालिटी शो ‘द भ्वाइस किड्स नेपाल सिजन ५’ मा उत्कृष्ट प्रदर्शन गर्दै सेमिफाइनलसम्मको गौरवपूर्ण यात्रा तय गर्न सफल भएकी छिन्।

बिजेश्वरी ज्ञान मन्दिर सैनिक महाविद्यालयकी प्रतिभाशाली छात्रा तथा सुबास केसी र कञ्चना सिंह केसीकी सुपुत्री सुवाशना वरिष्ठ युवा गायक वाङदेन शेर्पाको टोलीबाट प्रतिस्पर्धा गरिरहेकी छन्।

आफ्नो सुमधुर स्वर, भावपूर्ण प्रस्तुति, आत्मविश्वास र मञ्चमा देखिने उत्कृष्ट प्रदर्शनका कारण उनले निर्णायक, प्रशिक्षक र दर्शक सबैको मन जित्दै आएकी छन्।

सानै उमेरदेखि संगीतप्रति गहिरो रुचि राखेकी सुवाशनाले निरन्तर अभ्यास, कडा मेहनत, अनुशासित जीवनशैली, विनम्र व्यवहार, पारिवारिक संस्कार तथा नेपाली मौलिक कला संस्कृतिप्रतिको सम्मानका कारण हजारौं बालप्रतिभामाझ आफूलाई विशिष्ट रूपमा स्थापित गरेकी छन्।

सुवाशनाका अनुसार उनको सफलताको मुख्य आधार निरन्तर अभ्यास, गुरुजनको मार्गदर्शन, परिवारबाट प्राप्त हौसला र प्रेरणा हो। विशेषगरी हजुरबुबाबाट प्राप्त सांगीतिक आशीर्वाद तथा बुबाको गीत संगीतप्रतिको गहिरो लगावले उनको सांगीतिक यात्रालाई अझ प्रेरणादायी बनाएको छ।

उनका बुबाले पनि आफ्ना गीतहरू रेकर्ड गराई सांगीतिक क्षेत्रमा आफ्नो छुट्टै पहिचान बनाइसक्नुभएको छ, जसको सकारात्मक प्रभाव सुवाशनाको यात्रामा स्पष्ट रूपमा देख्न सकिन्छ।

‘कसरी म भुलेँ, केमा म भुलेँ’ बोलको गीतलाई अत्यन्तै भावपूर्ण ढंगले प्रस्तुत गर्दै सुवाशनाले दर्शकहरूको अपार माया र खल्ती एपमार्फत प्राप्त भोटका आधारमा सेमिफाइनलमा स्थान सुरक्षित गरिन्। त्यसैगरी अभय सुब्बाको चर्चित गीत ‘हे साइला’ मा दिएको ऊर्जावान, आकर्षक र उत्कृष्ट प्रस्तुतिका लागि उनले ‘Performer of the Day’ को उपाधिसमेत जित्न सफल भइन्। उनका हरेक प्रस्तुति दर्शकका लागि प्रतीक्षित बन्न थालेका छन्, जसले उनको बढ्दो लोकप्रियतालाई स्पष्ट रूपमा प्रमाणित गर्दछ।

उनको पहिलो प्रस्तुतिदेखि नै विभिन्न सांगीतिक कार्यक्रम, स्टेज प्रस्तुति तथा सिर्जनात्मक अवसरहरू प्राप्त हुन थालेका छन्। यद्यपि सुवाशनाको सबैभन्दा ठूलो सपना भने ‘द भ्वाइस किड्स नेपाल सिजन ५’ को उपाधि जित्दै नेपाली संगीत क्षेत्रमा सम्मानित र दीर्घकालीन पहिचान स्थापित गर्नु हो।

सेमिफाइनल चरणमा पुगेकी सुवाशनाले आफूलाई विजयी बनाउन नेपाल तथा विदेशमा रहनुभएका सम्पूर्ण नेपाली दाजुभाइ, दिदीबहिनी, आमा बुबा, आफन्त, साथीभाइ तथा शुभेच्छुकहरूलाई खल्ती एपमार्फत भोट गरी साथ, सहयोग र समर्थन गरिदिन हार्दिक अनुरोध गरेकी छिन्। एउटा प्रतिभाशाली बालगायिकाको सपना साकार पार्ने यो महत्वपूर्ण अवसर भएकाले सबै नेपालीले उनलाई माया, हौसला र मतदानमार्फत साथ दिनु आवश्यक छ।

सेमिफाइनलसम्मको प्रेरणादायी यात्राका लागि प्रतिभाशाली बालगायिका सुवाशना खड्का केसीलाई हार्दिक बधाई तथा फाइनल र उपाधि यात्राका लागि हार्दिक शुभकामना।