पशुपतिनाथ आरतीमा फिल्म प्रचार, सामाजिक सञ्जालमा विवाद

काठमाडौँ । पशुपतिनाथ मन्दिरको साँझको आरतीअघि फिल्म ‘आई एम जित बहादुर’को प्रचार गरिएको विषयले विवाद उत्पन्न गरेको छ । पुरुषोत्तम महिनाको अन्तिम दिन आयोजित आरतीमा फिल्मका कलाकारहरू जितु नेपाल, प्रियंका कार्की र वर्षा राउतसहितको टोली सहभागी भएको थियो ।

आरतीअघि फिल्म प्रचार र विभिन्न दाताहरूको नाम घोषणा गरिएकाले कार्यक्रम निर्धारित समयभन्दा ढिलो सुरु भएको भन्दै श्रद्धालुहरूले असन्तुष्टि जनाएका छन् । घटनापछि सामाजिक सञ्जालमा आलोचना बढेपछि अभिनेत्री वर्षा राउतले आफू आरतीमा मात्र सहभागी हुन गएको र त्यहाँ फिल्म प्रचार हुनेबारे पूर्वजानकारी नभएको स्पष्ट पारेकी छन् । यस घटनाले धार्मिक तथा सांस्कृतिक महत्व बोकेको पशुपतिनाथ क्षेत्रमा व्यावसायिक गतिविधि गर्न मिल्ने वा नमिल्ने विषयमा बहस चर्किएको छ ।