विवादमा ‘पाँच पाण्डव’ को आइटम गीत : निशानामा हरिवंश आचार्य

काठमाण्डौँ । फिल्म ‘पाँच पाण्डव’ को हालै सार्वजनिक भएको एउटा आइटम गीतलाई लिएर सामाजिक सञ्जालमा तीब्र विवाद उत्पन्न भएको छ । फिल्मको कथावस्तु र पात्रहरूको प्रस्तुतिले सनातन धर्म र संस्कृतिमाथि प्रहार गरेको भन्दै दर्शकहरूले यसको विरोध गरेका छन् । फिल्मका मुख्य अभिनेता हरिवंश आचार्य यस विवादको मुख्य निशानामा परेका छन्। फिल्ममा हरिवंशले युधिष्ठिरको भूमिका निभाएका छन् । ‍

‘राजा चाहिया छ’ गीतको भिडिओमा द्रौपदीको भूमिकामा रहेकी इभा गिरीको आइटम नृत्य देख्न सकिन्छ। साथै गीतमा हरिवंशसहित महेश त्रिपाठी, जितु नेपाल, आर्यन सिग्देल र सुशील सिटौलालाई देख्न सकिन्छ ।

तर, गीतको भिडि‌ओमा द्रौपदीलाई बार र रेस्टुरेन्टमा अर्धनग्न पहिरनमा आइटम डान्स गराइएको दृश्य राखिएको छ। महाभारतमा दुर्योधनको दासत्व स्वीकार नगरेकी, आफ्ना पतिको सम्मान र अस्मिता रक्षाका लागि साक्षात श्रीकृष्णको समेत साथ पाएकी तेजस्वी नारी द्रौपदीलाई यसरी प्रस्तुत गर्नु सनातन आस्थामाथिको खेलबाड भएको भन्दै दर्शकहरू आक्रोशित बनेका छन्। त्यस्तै, दशकौंदेखि नेपाली कला र हाँस्यव्यङ्ग्य क्षेत्रमा अमूल्य योगदान पुर्‍याएका हरिवंशजस्तो बौद्धिक र अनुभवी व्यक्तित्वले विवादास्पद कन्टेन्ट भएको फिल्ममा अभिनय गर्नु शोभनीय नभएको भन्दै धेरैले नैतिक प्रश्न उठाएका छन्।