ओलीले दोहोर्‍याए : जेनजी आन्दोलनका घटनाको जिम्मा लिन्न

काठमाडौँ । संसद पुनर्स्थापनाको माग गर्दै नेकपा एमाले अदालत जाने तयारीमा छ । मंगलबार च्यासलमा बसेको विघटित संसदीय दलको बैठकमा एमाले अध्यक्ष केपी शर्मा ओलीले यस्तो निर्णय सुनाएका हुन् । उनले सडक संघर्ष पनि गर्ने योजना रहेको बताए ।

जेनजी आन्दोलनका क्रममा भएका मानवीय क्षतिको जिम्मेवारी प्रधानमन्त्रीले लिनुपर्ने कुरा उठाउनेलाई पार्टी र नेतृत्वविरुद्धको हमला गरेको आरोप लगाएका छन्। निवर्तमान सांसदहरूको भेलामा बोल्दै ओलीले भदौ २३ र २४ का घटनामा आफूले जिम्मा नलिने कुरा पुनः स्पष्ट गरे । प्रधानमन्त्रीले जिम्मा लिनुपर्छ भनेको सुनिन्छ । जिम्मा लिनु भनेको के हो ? ओलीले भने, यो पार्टी र नेतृत्वविरुद्धको स्पष्ट हमला हो । लिडरसीपविरुद्धको हमला हो।

संसद भवनमा आगो लगाउन खोजिएपछि गोली चलाउनु परेको भनेर सेना प्रहरी लगायतका सुरक्षा अंगले भनिसकेको बताउँदै ओलीले त्यस बेला परिस्थिति नै त्यस्तो बनेको दाबी गरेका हुन् । जेनजी आन्दोलनका क्रममा ७६ जनाको ज्यान गएको थियो। त्यसमध्ये ४५ जनालाई अन्तरिम सरकारले सहिद घोषणा गरिसकेको छ ।